Hausa Writers Series

Wednesday, October 9, 2019

Tuesday, October 8, 2019

GASAR HIKAYATA 2019

RUBUTU MAI KYAU: MAFITA GA SABON MARUBUCI

Rubutunka Tunaninka

Kabiru Yusuf Fagge

RUBUTU MAI KYAU: MAFITA GA SABON MARUBUCI

Akwai abubuwa da suke taimaka wa sabon marubuci ya inganta rubutunsa ya zamo mai kyau. Sau tari marubuta sukan manta da wadannan abubuwa, kuma suna bayar da matsala a rubutu. Wadannan abubuwa su ne kamar:-

(1) Saka sauye-sauye ko sabani a tsakanin taurari, ko a rayuwar tauraro. Misali: Da farko sun tsani juna – A karshe sun koma son juna.

(2) Sauyin halayya: Da farko ya kasance mashayi – a karshe ya shiryu.

(3) Sauyi a zuciyar makaranci: Da farko kowa ya dauka tauraron labarin ne ya aikata wani laifi – a karshe ashe ba shi ya aikata ba.

(4) Ka da ka dora taurarin labarinka a kan rayuwar farin ciki tun daga farkon labari har karshe. Idan ya kasance haka, bai zama labari ba. Don haka dole ne ka gindaya musu wasu matsaloli ko tangarda, wacce za ta yi kamar ba za a iya warwarewa ba, sai a karshe a samu mafita.

Matsalolin da ake samarwa a labari sun hadar da:

(1) A tsakanin taurarin labarin da wani daga waje.

Misali – Wata tsohuwar budurwar tauraron ta kudirin aniyar ruguza auren tauraron ko ta halin kaka.

-Tsakanin tauraron da abokiyar zamansa.

Misali – Mijinta ne ya kasance cikakken mashayi. Kullum babu zaman lafiya.

-Tsakanin tauraron labarin da wani hali na rayuwa.

Misali – Takaici, wata cuta ko lalura da sauransu.

ABUBUWAN DA MARUBUCI ZAI SANI GAME DA TAURARO

Ya kamata marubuci ya san tauraronsa, don haka akwai wasu manya abubuwa da ya kamata lallai marubuci ya sani game da tauraronsa; babba ko yaro (wannan ya shafi tauraro mace da namiji)

Tauraro (a matsayin babban mutum)

1. Suna

2. Shekaru

3. Fasalinsa/Siffofinsa

4. Gidansa

5. Dangantakarsa/iyayen sa

6. Danginsa/iyalinsa

7. Abokansa a labarin

8. Alakarsa da sauran mutane

9. Aiki ko sana'arsa a labarin

10. Dabi'u ko halayyarsa

11. Irin abincin da ya fi so

12. Yanayin kayan da yake sawa

13. Yadda jama'a suke kallon sa

14. Ra'ayin sa

15. Burin sa

16. Muhimmin abin da ya kamata a sani a tare da shi

17. Shin makaranta za su so shi a ransu ko za su tsane shi?

Tauraro (karamin yaro)

1. Suna

2. Shekaru

3. Ranar haihuwar sa

4. Fasalinsa/Siffofinsa

5. Gidansu

6. Sunan mahaifinsa

7. Sunan mahaifiyarsa

8. 'Yan uwansa maza da mata

9. Matsayinsa a gidansu (na nawa ne?)

10. Abokansa na kusa

11. Abokansa na musamman

12. Abin da ya fi so (karatu, kallo ko kade-kade?)

13. Abin da ya fi ki

14. Matsayinsa a makaranta

15. Halayyarsa a makaranta

16. Wasannin da ya fi so

17. Abincin da ya fi so

18. Kayan da ya fi son sa wa

19. Alakar sa da sauran yara

20. Mutumin da ya fi masa muhimmanci a rayuwarsa (uwa, uba ko dan'uwa)

21. Halayyar sa a gida

22. Yadda mutane suke kallon sa

23. Ra'ayin sa

24. Shin zai shiga ran makaranta ko za su ji sun tsane shi?

KARIN BAYANI A KAN ABUBUWAN DA SUKA GABATA

1. Idan tauraron labarin yana aiki ko sana'a; shin yana jin dadin yi?

2. Daga cikin dabi'un tauraron akwai munana? Wadanne iri ne?

3. Wane irin buri ya ke da shi? Wane irin mutum yake son zama?

4. Me ya fi tsoro?

5. Mene ne aibun sa? Me ya rasa a rayuwarsa?

6. Wa ya fara so a ransa?

7. Wane abu mara kyau ne ya taba samun sa?

8. Dangane da burin sa na rayuwa. Ya cimma burin? Ta ya ya?

Friday, September 6, 2019

MARUBUCI SHI NE UBANGIJIN LABARINSA

Rubutunka Tunaninka

MARUBUCI SHI NE UBANGIJIN LABARINSA

Gabatarwa

Muna farawa da sunan maqagin baiwa da hikima, wanda ya saukar da Alkur'ani da ya labarta mana labaran al'ummun da suka gabata don izina da misali. Yabo ga mafi girman darajar halittun duniya da na lahira, (S.A.W.)

Da farko an samar ko in ce an sabunta wannan fili ne a wannan zaure domin darasi a kan DABARUN RUBUTA LABARI (littafi ko gajeren labari); DA SAURAN MATAKAN YIN RUBUTU MAI ARMASHI, a lokaci guda za a rinqa tattaunawa don faxaxa ilimi a harkar rubuce-rubucen labaru na Hausa.

Rubutunka Tunaninka;- Duk marubuci kafin ya yi rubutu sai ya yi tunani akan abin da zai rubuta, don haka kenan rubutun da marubuci ya yi tunaninsa ne, (hakan ya zama rubutunka tunaninka) akasi daya da ake samu shi ne tunanin ya zama ingantacce ko karvavve ko kuma akasin hakan.