Thursday, October 22, 2026

GASAR ƘAGAGGUN LABARAI TA WOW



GASAR RUBUTUN ƘAGAGGUN LABARAN HAUSA TA ƘUNGIYAR WOW TA 2026


A karon farko ƙungiyar mata ta Women of Words ta shirya gasar rubutun gajerun ƙagaggun labarai na Hausa. Jigon gasar shi ne "Ƙalubalen Zawarci ga 'Ya'ya Mata" an sanya gasar ne domin fito da ƙalubalen da mata suke fuskanta a zawarci da kuma kawo hanyoyin da za su samu mafita. Abu na biyu an samar da gasar ne saboda taya ƙungiyar Women of Words (WOW) murnar cika shekaru biyu da kafuwa. Sai dalilin sa gasar na uku shi ne domin bai wa 'ya'yan ƙungiyar dama ta musamman a harkar rubutu, shi ya sa aka sa gasar garesu, su kaɗai.


Marubutan da suka samu nasara su ne kamar haka:

1. Maryam Aminu Musa ita ce ta zo ta ɗaya da labarin KU YI MINI ADALCI.

2. Fauziyya Sani Jibrin ita ce ta zo ta biyu da labarin GUDUN NAUYI.

3. Khadija Sadisu Saminu ita ce ta zo ta uku da GABA KURA...


Aƙalla labarai guda 40 ne suka shiga gasar daga marubuta mabambanta. Aka tace guda 12 waɗanda suka je matakin ƙarshe, inda aka zaɓi guda 3 daga ciki. Sauran labaran sun haɗar da Bazawara da Daƙiƙa Biyar da Gidan Marina da Gishiri a Rauni da Kuncin Zawarci da Mummunan Zato da Neman Gira da Zaman Zawarci da Zawarci a Yau. 

Shugabar ƙungiyar ta tabbatar da cewa gasar za ta ci gaba da fatan ta ɗore har abada. An bayar da kyaututtukan karramawa da shaida ta musamman ga zakarun gasar.


-Kabiru Yusuf Anka

Thursday, October 1, 2026

GASAR RANAR MARUBUTA



KWAMITIN SHIRAYA TARON RANAR MARUBUTA HAUSA HADIN GUIWA DA GAME CHANGER GROUP (TGCG),


GASAR RUBUTUN GAJERUN LABARAI TA RANAR MARUBUTAN HAUSA TA DUNIYA 2026


A shirye-shiryen bukin Ranar Marubutan Hausa ta Duniya na shekarar 2026 wanda za a gabatar a Birnin Katsina a ranakun 31/12/2026 zuwa 01/01/2027. An shirya gasar rubutun gajerun labaran Hausa a kan batun Tu'ammali da miyagun ƙwayoyi daidai da taken taron na bana, wato Gudunmuwar Marubuta Wajen Hana Sha da Fataucin Miyagun Kwayoyi. Damar shiga gasar a buɗe take ga dukkan masu sha'awar shiga daga marubuta maza da mata sanannu da sababbi da ma masu sha'awar fara rubutu matuƙar za su kiyaye ƙa'idojin gasar. 


MAUDU'IN GASAR


Yaƙi da sha da Fataucin Miyagun Ƙwayoyi


MANUFOFIN GASAR


1. Ƙarfafa marubuta su yi nazari kan yadda tu'ammali da miyagun ƙwayoyi ke shafar goben ƙasarmu tare da haska dabaru na yaƙi da matsalar. 


2. Samar da sababbin ra’ayoyi da mafita na zamani da za su iya taimaka wa al’umma wajen fuskantar ƙalubalen sha da fataucin miyagun ƙwayoyi. 


3. Sake fito da wata kafa ta musayar ra’ayi kan alaƙar shaye-shaye da safarar miyagun ƙwayoyi da taɓarɓarewar tarbiyyar al'umma. 


4. Ba wa marubuta damar nuna fasaha da basira da ƙwarewarsu a fannin rubutu da bincike ko ƙirƙira, musamman a kan abin da ya shafi tu'ammali da miyagun ƙwayoyi. 


5. Samar da ƙarin abin karatu mai inganci da manufa cikin harshen Hausa. 


TSARE-TSAREN SHIGA GASAR


1. Za a aiko da samfurin labarin da za a rubuta cikin kalmomin da ba su gaza 500 ba kuma ba su wuce 800 ba, ta wannan adireshin; ranarmarubutanhausa2025@gmail.com daga ranar 05/10/2026 zuwa ranar 30/10/2026. 


2. Za a tace a zaɓi 30 cikin samfurin labaran da aka turo waɗanda suka fi burgewa a cikin kwanaki bakwai (30/10/2026 zuwa 7/11/2026). 


3. Za a yi bita ta musamman ga masu waɗannan samfurin labaran 20 a kan wasu batutuwa da suke da alaƙa tu'ammali da miyagun ƙwayoyi da gasa da kuma rubutun gajerun labarai.


4. Bayan bitar, za a buƙaci kowannensu ya rubuto cikakken labarinsa wanda bai gaza kalmomi 1000 ba kuma bai wuce kalmomi 1,500 ba bayan bitar, daga 15/11/2026 zuwa 15/12/2026.


5. Za a bayyana labaran da suka yi nasara a wajen bukin Ranar Marubutan Hausa ta Duniya 2026. 


*SHARUƊƊAN SHIGA GASAR*


1. A tabbatar rubutun ya dace da batutuwan da suka shafi yaƙi da sha da fataucin miyagun ƙwayoyi. 


2. A tabbatar an yi amfani da daidaitacciyar Hausa kuma an kiyaye ƙa'idojin rubutun Hausa.Dole ne amfani da haruffa masu lanƙwasa(ɓ, ɗ, ƙ, 'y).


3. A tabbatar an aiko da rubutun a tsarin Microsoft word kawai zuwa ga wannan email ɗin; ranarmarubutanhausa2025@gmail.com. tare da shedar yin rijista.


4. A tabbatar ba a taɓa shiga wata gasa da labarin da za a turo ba, kuma ba a taɓa bugawa a jarida ko wata kafa ko zaurukan kafafen sadarwa na zamani ba.


5. Wanda yayi rijista da taron Ranar Marubuta Hausa ta 2026 ne kaɗai zai iya shiga gasar.


6. Mutane biyu za su iya shiga gasar da labari ɗaya. Kuma dole ne a aiko da labari cikin lokacin da aka ƙayyade.


7. Kada labarin ya zamto ya ci zarafi ko tozarta wata al'umma ko ɗaiɗaikun mutane. 


7. Ba a yarda a sake ɗaukar duk labarin da aka shiga da shi gasar a sake shiga wata gasar da shi ba.


8. A sani, hukunci da sakamakon alƙalan gasar shi ne na ƙarshe, ba za a sake tattauna shi ba a wani waje.

9. Kowane marubuci na iya shiga gasar ban da mambobin kwamitin ƙoli na shirya wannan taro.


KYAUTUTTUKAN DA GASAR ZA TA SAMAR 


1. Za a bayar da kyaututtuka ga labarai uku da suka yi zarra a matakin na 1 zuwa na 3. 


2. Za a bayar da takardar shaidar karramawa da awalajar litattafai ga waɗanda suka shiga gasar daga na 1 zuwa na 15 kuma za a duba yiwuwar buga labaran nasu cikin littafin da za a ƙaddamar da shi a taron shekara mai zuwa ta 2027. 

Dr. Mujaheed Abdullahi Kudan,

A madadin Kwamitin Shirya Gasa na Ranar Marubutan Hausa 2026.
 

Ga link na yin rijistar 

https://ranarmarubuta.com.ng

GASAR TSARIN BANGO

 




GASAR TSARA BANGON LITTAFI


Sunan Littafi: GOBARAR DAJI


Gidauniyar Adabi ta Dangiwa na gayyatar ƙwararrun masu zane da tsara bangon littattafai (Book Cover Designers) domin shiga gasar ƙirƙirar kyakkyawan bango na littafin GOBARAR DAJI.


Gobarar Daji littafi ne da ya yi magana kan matsalar barace-barace a cikin al’umma, illolin da take haifarwa, da hanyoyin da za a bi wajen magance matsalar. Saboda haka, ana buƙatar mai tsara bangon littafin ya fahimci ma’anar taken da kuma babban jigon littafin kafin ya ƙirƙiri zanen.


Abin da ake nema


Mai zane ya kamata ya samar da bango wanda:


- Zai bayyana ko ya yi ishara da ma’anar “Gobarar Daji” ta hanyar fasaha.

- Zai nuna matsalar barace-barace da kuma buƙatar samun hanyoyin magance ta.

- Zai kasance mai ɗaukar hankali

- Zai haɗa taken “GOBARAR DAJI” cikin rubutu mai kyau da sauƙin karantawa.

- Hotuna, alamomi ko zane-zanen da za a yi amfani da su su dace da taken littafin da jigon sa.



Muhimmin bayani ga masu shiga gasar


Hotunan da aka sanya a ƙasa misalai ne daga litattafai uku da  gasar da aka gudanar a baya. An sanya su ne domin su taimaka wa masu shiga gasar fahimtar irin aikin da ake nema.


Ba a buƙatar a kwaikwayi waɗannan hotuna ko tsarin da aka yi amfani da su a baya. 


Abin da muke son gani


Muna son ganin yadda mai zane zai iya mayar da taken “Gobarar Daji” zuwa bango mai ɗauke da saƙo mai zurf, bango wanda zai sa mai kallonsa ya fara fahimtar cewa littafin yana magana ne kan barace-barace, matsalolin da take haifarwa, da hanyoyin da za a bi wajen magance ta.


Saboda haka, muna buƙatar fasaha, tunani, ƙirƙira da fahimtar jigo.


Lokaci 


Wannan gasa tsawon kwana uku me kacal daga gobe  2/10/2026 zuwa 5/10/2026 za a tura aikin da aka yi a Watsapp din  wannan lambar  09033492760. 

Za a zabi bango ɗaya da yayi fice inda za a yi amfani da shi a littafin kuma za a bayar da kyauta da karrama wanda yayi nasarar a taron da za a gabatar na bayar da kyaututtukan gasar a Katsina ba da dadewa ba.

GASAR ƘAGAGGUN LABARAI TA WOW

GASAR RUBUTUN ƘAGAGGUN LABARAN HAUSA TA ƘUNGIYAR WOW TA 2026 A karon farko ƙungiyar mata ta Women of Words ta shirya gasar rubutun gajerun ƙ...