BARAYIN BOYE

BARAYIN BOYE

Wani manomi ne wanda ya tsufa sosai, aka kulle dansa a gidan maza (fursuna) saboda laifin da bai ji ba bai gani ba. Wannan dattijo ya rasa yadda zai yi, kuma ga tsufa, sai ya rubutawa dan nasa wasika kamar haka:

Ya kai dana, a wannan shekarar shi kenan ba zamu yi noman da muka saba ba, sbaoda ba zan iya tonon kasa ba, dama kai ne kake tayani, yanzu ga shi ba ka nan!"

Da aka kai wa yaron bayan ya karanta yana hawaye, sai ya sa 'yansandan da suka kawo masa wasikar, suka ba shi biro da takarda, ya rubutawa mahaifinsa nasa amsa kamar haka:

"Ya Babana kar ma ka fara tunanin noma wannan gonar domin a wajen na binne Miliyan dari din da suke zargina na sato."

Lokacin da 'yansandan nan suka taho domin kai wa Dattijo wasikar nan, sai suka karantata a hanya, ai kuwa nan da nan suka nufi gonar mutumin nan suka rinka haketa, suna tono, sai da suka nometa tas, amma ba su ga komai ba.

Washegari yaron nan ya sake rubutawa mahaifinsa nasa wata wasikar ta daban, yana cewa:

"Ya Babana yanzu za ka iya yin shukar da kake so, don na tabbatar an nome maka gonar."

Da mahaifin ya je, ya gani, sai ya yi dariya ya ce, "Lallai yarona kana da basira, kana daure a gidan maza amma ka sa barayin boye sun yi maka aiki. Ai jiyan ina boye, ina hangosu, na ga yadda DPO da yaransa suke ta faman noma, su ga barayi."